حارس بقلم الشاعر / حسين ابراهيم
******(حارس)******
بقلم / حسين ابراهيم
أنا اللي علي بابك واقف
من سنين حارس
وأنا اللي وقت الخطر
كنت علي وتر الالم دايس
ولما جم المغول والتتر
كنت أنا الفارس
اللي هزمهم ورجعهم علي بلادهم
وأنا اللي في حطين
كنت مع الناصر صلاح الدين
نرد القدس
ونطرد الصليبين
وفي المنصورة كنت مع قطز
يوم ما آسرنا لويس
وهزمنا الصليبين
وأنا اللي ابويا وصاني
عالقدس وفلسطين
قالي.. دي جرحها في القلب
ومرسوم عالجبين
وف تمانية واربعين
حشدت جيوش العرب
ورحت ارد الارض
لكن زاد الجرح
وصبحنا في هم وترح
وأنا المهزووم في
سبعة وستين
لكن عمري ما كنت بأخاف
وف الاستنزاف
كنت مع جنودي بنعبر
نقتل العدو وندمر
حصون ولاد صهيون
وف تلاتة وسبعين
دمرت حصون بارليف
وعادت سينا وطابا لحضننا تاني
يومها ركعت لربي
وكنت لترابك بايس
انا جندي من رجال الجيش
الواقفين علي حدودك
وأنا الشرطي اللي سهران
احافظ علي صمودك
امين شرطة والا ظابط جيش
كلنا منكم وروحنا فدا وجودك
أنا اللي زرعت القمح وطحنته
ومش لاقي رغيف العيش
وأنا زرعت القطن ونسجته
ولما صار توب صدرتيه
وأنا بالبس خيش
وأنا لما لصوص اوطان
باسم الدين سرقوك
لفيت ودرت عالقهاوي وقري ونجوع
ألم الناس عشان يردوك
ولما لحضننا رجعت
يومها بكيت
أنا اللي بين دواليب العمل لايص
دا رشوة ودا واسطة
وشغل مافيش
أنا مش طبال زفة ولا فالفرح
رقاص
ولا في حبك كنت يوم مهياص
ومهما تعبت فيكي والا آسيت
والا علي مر الزمان علي كتفي
انا شايلك
والا شايل طينك
والا لزبالتك بقيت كناس
ماقدرش ارد جميلك
دانا لحمي من خيرك
أنا اللي خدت منك وانا صغير
قلم مع كراس
وعلمتيني في جامعة ومدارس
سامحيني لو آسيت عليك من غلبي
لكن مهما جري منك
هافضل علي بابك حارس...
تعليقات
إرسال تعليق