صباح الخير ( للشاعر الكبير يوسف الحمله )
صباح الخير للشاعر يوسف الحمله
صباح الخير على أحلى ولاد بلدي
صباح الخير
على فيروس بيهري في قلبي
وفي كبدي
على لقمة عيش بطعم الذل
على كلمة حق إتحشرجت
في شجر الفل
على شاب عاش يحلم ببكره
واحلامه بتطرح ضل
على أيام شايفينها وعايشينها
خل يا عيني في خل
صباح الخير
على فــلاح معرفش يوم طعم الراحة
على زرعه بتطرح له في ديون دباحة
على قمحه اللي غالي عليه وهو دقيق
على قصبه اللي غالي عليه وهـو سكـر
على مســؤول على الشاشة نازل نهيق
فاكر هيغير فـي الوضـع اللي متـعكـر
ونسـي عـقله إللي متـهكر
وغلطة اللي دايماً متـكرر
وجاره اللي عايش بيفرفر
مــن كتر فساده وإفساده
وأهو بفساده
عليه ببروده بيضحك ويكركر
صباح الخير
على شاب سابها من ضيقة
ومات في عرض البحر
على بنت عانس رغم جمالها
ومش لقيه شاب بربع المهر
على موظف عايش معدوم
ونازل سلف لأخر الشهر
على طالب سـهـر الليالي
وأبو برشامه زعيم الكفر
على أعياد بدم الشهدا تتأجل
ويا خوفي لاتتأجل لأخر العُمر
صباح الخير
على الزباله اللي شيلنها
وع الكهربا دفعين تمنها
على الشوارع واللي فرشينها
ورئيس الحي دمر سُكانها
على فواتير على خوابير
من الناس اللي عارفينها
وأرفينا وياريت لو كنا أرفينها
على حكه بتطلع باللحم
من العيشه اللي عايشينها
صباح الخير
على موهوب سنين كومبارس
وأمله ياخد دور البطولة
على طلبه باعت الكتب يا وزير
وعاشقه تملي سنه أولى
على طفله في سن الرضاعة
ماتت "مغتصبه" ومقتووله
على سواق شنق نفسه بنفسه
عشان اليد مغلوووووله
على طير هجر عرشه وفرشه
عشان الشجرة مشلووووله
بترويها بمية مجاري يا حضاري
وبتخبي لييييه
ده كلنا والله عارفين الفوله
صباح الخير
على الجنيه اللي بقى يساوي
وبالعافية حزمة جرجير
على الغلا اللي احنا فيه
والمسؤولين في نوم وشخير
صباح الخير
ويجي بس منين الخير
والمسؤول واخد على التخدير
والشعب اللي مستني شهر سبعه
بقاله سنين ومجاش بالخير
وكاتب زي حالاتي يوماتي
بيدن في مالطا ونفسه يطير
ويروح لبلاد تقدر قلمه وفنه
قبل ما سنه يقع في البير
صباح الخير
على تقدم أحدث الحضارات
وأقدمها تملي في التأخييير
صباح الخير
للشاعر الشاعر يوسف الحمله
19/4/2017
تعليقات
إرسال تعليق