..دون_يا_مدون..حامي_الأرض..نبتدي منين الحكاية....لما أنادي ف عز ليلي...سأرحل عنك..لما قلت مرة وطني..الجندي_المجند........حبة_أمل_يا_محسنين...أنا_السوري....ياللي غاوي تكون ضوبتمنى عيف....للشاعر المبدع ابراهيم بدر عبدالله..
#دون_يا_مدون
يا مدون لينا الدواوين
ويا كاتب تاريخ الناس
ويا ملاغي بكى السنين
ومكتم على الأنفاس
يا كاتب بكى الأوطان
ويا دايس على الأطيان
ويا مدلل قلوب أنجاس
متكتب بس بضميرك
بلاش تضحك على غيرك
ولا تسمن ف طير غيرك
وسيبك بس م الوسواس
يا مدون لينا الدواوين
وطننا بيساعي الأشراف
وبيساعي اللي من غير دين
ومين سامع ولامين شاف
وطننا لكل الأطراف
م تبني بس على أساس
بلاش ترفع أي خسيس
وأحلامنا تكون كوابيس
وتمحي اللي هوا شريف
وبتعلي ف عيل سيس
و أرواحنا بيك.. تنداس
بتحفر حرف ع الأحجار
بلاش تبهم كدة الأسرار
ولا تحير ولا تحتار
ولا تشيل الخبيث ع الراس
ولو جفت مني اقلامك
بلاش تعمل بدمي الحبر
أنا مأمنك على كلامك
م تكتبني ف خانة الصبر
دموعي تبوش الكراس
#إبراهيم_بدر_عبدالله
...
.2
#حامي_الأرض
منصب روحه علينا ولي
وفاكر إنه مش إنسان
فاهم إنه م الفضا نازل ددبان
كلامه يبقى زي السيف
ممشينا كدا ع الكيف
وانا مصدق ومش حرنان
وبلضم أملي ف الضلمة
وبشرب من كاس الحرمان
يا واد اشرب واتهنى
بحلم سرابك اتمنى
وصدق اللي يوم مثل
وسقف للي يوم غنى
وقالي إنه بيناول وبيشيد
وقالي إنه بيعلي ودا بنا
وهوا اللي حامي الأرض
وهوا اللي حامي العرض
وقالي إنه هوا الفرض
كلامه يبقى لي سنة
ولو كحيت م يعجبهوش
يقطعني ولا اشكي
وكل يوم بتيجي وشوش
ودا يصوت ودا يبكي
ترابي ليه عليكم هان..؟
ونفسي أشبع ولسه جعان
مليت بالهم كراسي
ولادي هم حراسي
أنا فاكر ومش ناسي
بأن الجبن دا وراثي
وإن النار م بتواسي
م قالهالي مرة يوم الشيخ
بأن سلاحي دا فاسي
وإني بدونه راح اعاني
ومن غيره يبقى حقاسي
وكسرتوا ف أيدي الفأس
وبشحت بسمتي م الناس
وبشحت حتى إحساسي
إبراهيم بدر عبدالله
.
3
نبتدي منين الحكاية
نبتدي من يوم م شوفتك
ولا من ساعة كلامنا
نبتدي من شكل رمشك
والعيون تحكي سلامنا
نبتدي ونقول ياريت
حلمنا م يكون نهاية
حبنا ليه ألف معنى
القمر كان يوم جمعنا
حتى كوننا لم يسعنا
أرضنا تحضن ..سمانا
نبدأ الحلم اللي غايب
نبدأه والقلب دايب
والقدر هوا اللي كاتب
أصل شوقنا اللي رمانا
دانت شوقك كان حاضني
نبض قلبك جوا مني
وانت أنفاسك دفايا
شوفت مرة الشوق ناداني
قمت انا قربت منه
قلت شوقي اللي رماني
حتى طيفه كان معايا
.Ibrahim_Bad
.
4
لما أنادي ف عز ليلي
والقى ليلي يبقى ويلي
بلقى أنفاسك ف قلبي
والقى شوقك بيناديلي
بعترفلك إني عاشقك
حيرتي تاهت جوا حلمك
وف عينيك احتار دليلي
بعترفلك إني تايه
قلبك انت مالوش تشابه
جوا شوقي بلقى شوقك
جوا قلبك بتداريني
ياللي مش عايش ظنوني
ياللي بيك بيزيد جنوني
دانت بيك دابت عيوني
بس عارفك مش ناسيني
مهما تبعد راح تقرب
لو تشرق .. أو تغرب
مستحيل من شوقي تهرب
دانت بعدك مش سبيلي
Ibrahim_Badr
.
5
سأرحل عنك
إلى عالم لا يعرف خزي
ولا يعرف سفكا للدماء
فلا تبك يوما
فإنني يحرقني البكاء
فها قد سئمت
وإني تملك مني الملل
أجوب بعيني يمينا
فياتيني من يساري الشقاء
سأرحل عنك...
وأترك عندك قلب ينبض
عليل يا وطني
و أرضك تنبت لغما
وتمطرك به حتى السماء
فخيرك يطغى
ونيلك يسري
ولكن يحاصرك الفناء
سأرحل عنك ولتذكرني
فأنا لم يعرفني الجفاء
أقر بعشقك
ويملأ قلبي منك الوفاء
إبراهيم بدر عبدالله
.
.6
لما قلت مرة وطني
شاورتلي بالإتهام
لما جاعت مرة بطني
قلت أربط الحزام
الأمل كان بيحاوطني
كان عدوي الانهزام
لما خدت ف مرة نفسي
قلت راح تدفعلي كام
النفس بقى بالفلوس
حتى حلمي صار كابوس
الشريف أصبح جاسوس
والكلام مل الكلام....
لما قلت إني جايع
قاموا قالولي هاجر
القعاد م عادش نافع
ليه بأحلامنا تتاجر
ليه بتعملي صدام..؟
Ibrahim
.
.7
#الجندي_المجند
روحت جيشي مرة ياما
بس انا رجعت ف تابوت
كان صباحك عندي همة
كنت م اعرفش السكوت
كنت زي نور في ضلمة
بقرا حرفك بأعلى صوت
قمت انا شميت ..ترابك
كنت ببكي جنب ...بابك
أصل انا خدام ...جنابك
كنت ضي ف قلب حوت
كنت انا شمس ف سماكي
حتى عمري كان فداكي
كنت لعنة لمين اذاكي
كات حياتك عندي موت
أوعي تبكي لجلي ياما
أصلي بتكوي بدموعك
ياللي إسمك أغلى كلمة
حتى قلبي بين ضلوعك
د الصباح بهواكي نعمة
والخضار ساكن فروعك
والجاني مش راح يفوت
بس روحي هتبقى لعنة
لكل قاتل أو..... جبان
عمري م هديله ..هدنة
عمره ما هيعرف أمان
مهما كان جاير طاغوت
إبراهيم بدر عبدالله
.
.8
#حبة_أمل_يا_محسنين
لو سألت ف مرة قلبك
عن كلام بيدور في فكرك
راح يقولك انت ايه
راح تلاقي فيه حكايتك
ترسم الأمثال ف غايتك
تتكتب كل الحروف
تبقى م تعرفش خوف
أنت مش وليد ظروف
صورة محفورة ف مرايتك
راح تشوف إنسان سعيد
راح يلين ليك الحديد
راح يدوب ليك الجليد
راح تلاقي الهم نابذك
يرقص البدر ف عينيك
والنجوم تنده عليك
تمحي همك من ماضيك
تشرق الشمس ف غلاوتك
لو تنادي على الآمال
تلقى ف الدنيا الجمال
والملل هيكون محال
بس تيجي على قساوتك
الحكاية جوا قلبك
لعبة الحياة ف قرايتك
ترسم الأشواق ف دربك
تلقى ف الأفراح روايتك
لو سألت ف مرة قلبك
#راح_يقولك
إبراهيم بدر عبدالله
.
9
#أنا_السوري
بفتح عيني في الضلمة
أشوف الحلم يبقى كابوس
تدور جوايا مية كلمة
وبلقى الفكر يبقى جاسوس
ويجي الفجر بشروقه
ينادي شمسنا بشوقه
وببقى بنوره أنا مهووس
رجولة تبقى هز كتاف
شجر أخضر وأصبح جاف
بينخر ليه ف قلبه السوس
بطرف عنيا ألمح غيث
اناديله وانا حيران
اتاري الغيث عايزله مغيث
وغيث القش دا بهتان
أنا والغيث ساوونا الروس
يا سوريا آه يا أرض الخير
بشوفك أرض للفيروز
م تمحي كل خسيس و أجير
و أبنك فيكي ليه منبوذ
ومال حظه كدة منحوس
إبراهيم بدر عبدالله
.
10
ياللي غاوي تكون ضعيف
تدفن الكلمة ف ملامحك
والربيع عندك خريف
راح تلاقي الجوع ف قمحك
راح تشوف الكلمة باهتة
والجراح ف القلب جاهزة
راح تلاقي ظلام ف صبحك
ضعفك انت فيه حكايتك
فيه بداية تشوف نهايتك
والعجين راح يبقى رمحك
نار ما تعرف يوم حرارة
زي كسفة ف عين عزارا
ضعفك انت هوا شبحك
تندفن جوا ف كتابك
راح تشوف هزل ف شبابك
والوهن هوا اللي دابحك
تمدح انت ف قلب عيبك
تلقى ذل يعادي شيبك
والأسى هوا اللي مادحك
إبراهيم بدر عبدالله
.
11
وبتمنى
يعود بينا زمان ..عدى
زمان فات بقاله زمان
وأهمسلك بإحساسي
ولا أعرفش بيك حرمان
الاغي الليل بإحساسك
تطل عليا أنفاسك
أنا كتابك وكراسك
يقولوا علينا كان ياما كان
وتسمعني وانا بهمس
و ألقى هوانا يتنفس
بقلب هواك أنا اتشمس
وبوجودك م اكون بهتان
اكونلك وردة تهواها
وشمس تهم في سماها
وكلمة ترن في صداها
وسرك عندي ف الكتمان
تونسني على حروفي
تأمني أنا ف خوفي
وتبقى الجرأة ف كسوفي
تكون عندي كما البستان
تطل ف قلب أحلامي
واشوفك حلم قدامي
تحلي حروفي وكلامي
وتلقاني ابقى بيك هيمان
وبتمناك تكون فكرة
أكون ليك ولو ذكرى
حياتي ف أمسي وف بكرة
سعادتي تساعي إنس وجان
إبراهيم بدر عبدالله
تعليقات
إرسال تعليق