مسرحية هزلية من داخل البيوت المصرية ( للشاعر القدير يوسف الحمله )
مسرحية هزلية
من داخل البيوت المصرية "للشاعر يوسف الحمله"
في يوم من الأيام
سألوني أولادي آدم وزياد
بابا
على فين رايحه بينا البلاد؟؟
في ظل غلاء الأسعار
والهمجيه والإستهتار
والزباله اللي بقت
محاوطه بيوتنا ليل نهار
وقفت قدامهم مذهول
وكأني ضارب قدرة فول
الولاد بصوا لأمهم
وقالولها غششيه كلمتين
قربنا نشوف دموع العين
الأم حالها طلع من حالي
وعشان تهرب من عيالي
ردت وقالت الغش حرام
خلوه يعتمد على نفسه
إنفخ صدرك يا عبوووود
وقالتلي كمان
مش بتقول إنك شاعر
رد عليهم لو كنت قادر
قلت لهم
بصوا بقى يا حلوين
الحكاية دي عايزه قاعده
على كام وسيلة مساعده
قالولي هي وسيلة واحده
قلت لهم
عندي صديق إنما متحدث
وعمره من الأفكار ما يفلس
قالولي مين
قلت لهم الشاعر عبيد رياض
قالولي رن عليه يا للا
قلت لهم كله على الله
ترن ترن ترن ترن
الووووووووووووو
السلام عليكم أستاذ عبيد
معك الشاعر يوسف الحمله
من داخل محكمة الأسرة
عندي سؤال مهم لآدم وزياد
على فين رايحه بينا البلاد
قالي معاك وسمعك
بس ايه هو السؤال
قلت له سؤال لآدم وزياد
على فين رايحه بينا البلاد
قالي معاك وسمعك
بس هو ده السؤااااال
قلت له أيوه
رد وقالي
هو احنا مخلفين بني آدمين
ولا احنا مخلفين شياطين
أنا برادو
إبني أحمد من سنتين
بيسألني نفس السؤال
ومش عارف أرد يا زين
قلت يادي الليلة الطين
والحل ايه يا عم عبيد
قالي الحل عند المسؤولين
رنيت علي أحد المسؤولين
ترن ترن ترن ترن
الوووووووووووو
السلام عليكم يا افندم
معك الشاعر يوسف الحمله
من داخل محكمة الاسرة
عندي سؤال مهم لآدم وزياد
على فين رايحه بينا البلاد
رد وقالي إفتح الإسبيكر
وبالنسبه للسؤال
فمتقلقوش ياولاد
عندنا بدل القناة إتنييييين
يعني علي النعيم رايحين
والأسعار أن شا الله هتنزل
واللحمه هتبقى بعشريييين
والوظيفه قبل ما تتخرجوا
هتلاقوها جيالكم بجناحين
وكباري في كل مكان تلاقوا
وسم يهري في الأبدان تلاقوا
وإعلام محترف في الكدب
وكله هري في الباذنجان
وان كانت الأسعار مستأسده
بكره هتكون فار كمشان
وسامحوني على بعض الكلمات
أصلي بقالي عشر سنوات جعان
وعايش على شرب الميه
وشرب الميه ده للناس الجدعان
إحنا من سبع تلاف سنه عايشين
لا خوفنا يوم من أمريكان
ولا روس ولا حتى الاردوغان
وان كانت السعودية زلانا
أدينا قطعنا العلاقات وياها
وسكتناها بصنافير وتيران
ورحنا لبشار الأسد السعران
علشان نرضي الخاله إيران
فمتقلقوش أبداً ياولاد
الخير عن الأول زاد وزاد
حد عاد بيشوف أمرأض
أو حتى شـبة أعراض
إحنـا دخلـنا الإستعراض
وباذن الله مُنتصــرين
والولاد مش مصدقه
وعلينا نازلين تريقه
قلت الحل في سم الفار
أو أتعلق في سقف الدار
وعلى كده ينزل الستار
سمعت الآذان قلت أصلي
وأطرد شيطاني بالإستغفار
وأطرد شيطاني بالإستغفار
مسرحية هزلية
بطولة أسره مصرية
من إنتاج وإخراج فساد المسؤلين
بقلم الشاعر يوسف الحمله
14/1/2017
تعليقات
إرسال تعليق