سيجال ٠٠٠٠ للشاعر / يوسف الحمله والشاعر / عبيد رياض
الصداقة أفعال
سيجال ٠٠٠٠٠٠٠
للشاعر / يوسف الحمله
والشاعر / عبيد رياض
،،،،،،،،،،،،،،،،،،،،،،،،،،،،،،،،
يوسف ٠٠٠٠
فينك يا عبيد مبتسألشي
مش للصداقة برضه حقوق
والا انت على مبتدورشي
غير لما بتكون مزنوق
رد على ومتطنشي
ومتزعلشي عشان مخنوق
---****---
عبيد ٠٠٠٠٠
بص ياصاحبي يا رقه يا زوق
قبل ما تيجي تقول مخنوق
شوف مين فينا مطنش
برن عليك وإنت مبتردش
---****---
يوسف ٠٠٠٠٠
دانا لسه سائل عم حسين
قال معرفشي فين أراضيه
والكلام ده بقاله يومين
وأنا مش عارف أعمل ايه
وسألت أمل يمكن تعرف
ردت وقالت والله ماأعرف
مبقاش باقي غير الجرانين
---****---
عبيد ٠٠٠٠٠
عمك حسين معايا كل يوم
بلاش كلام مالوش لزوم
رايح تسأل كمان أمل
ياخي قول كلام يتعقل
---****---
يوسف ٠٠٠٠
يعنى ايه
قصدك تقول إن أنا كداب
وفاتح ع البحري الأبواب
طب إسأل سامح بك حراز
هيقولك عني زينة الشباب
---****---
عبيد ٠٠٠٠
بتجيب سيره سامح ليه
ممكن تقولي قصدك ايه
قاصد تشبكني مع الناس
و لا هو كلام وخلاص
دانا لسه مكلم أبو دحروج
قالي ده راح لطريق معوج
و سألت عليك الأستاذ المصري
قال دا يوسف ده منفضلي
---****---
يوسف ٠٠٠٠٠
يا عم عبيد بلاش دحروج
هتدخلني في طريق معوج
دانا لسه فايق من الديوان
وناقد الجيل ضربة كربوج
والاستاذ المصري حبيبي
وبلاش بقى شغل المونولوج
---****---
عبيد ٠٠٠٠٠
سألت عليك العميد على مصطفى
قال عليك يا صاحبي راح واختفى
لاء وكمان سألت الشاعرالغنائي
قال يا عم عبيد انا مش لاقي
كلام ارد حتى بيه
أصل يوسف عامل بيه
---****----
يوسف ٠٠٠٠٠
بيه على ايه دانا غلبان
دانا شاحت تمن الديوان
انا قلت بس أسأل عنك
بسم العيش والملح كمان
وانت عارف انك حبيبي
والصداقة مش بس كلام
---****---
عبيد ٠٠٠٠٠
تسلم يا صاحبي على السؤال
و ربنا يصلح لك يا رب الحال
انت يا سيدي ابن حلال
و انا دايم عليك بالسؤال
---****---
يوسف ٠٠٠٠٠
ربنا يخليك ليا يا عبيد
ويعطيك م الإبداع ويزيد
انت حقيقى إنسان جميل
وعلم من أعلام الصعيد
…………………………
الصداقة أفعال
سيجال
للشاعر يوسف الحمله
والشاعر عبيد رياض
تعليقات
إرسال تعليق