ياسين وبهية والذئب سمعان بقلم الشاعر يوسف الحمله
ياسين وبهية
والذئب سمعان
:؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
دخل ياسين علي بهية
وهي قاعدة في الغية
وبتقول للحمام حِمْ حِمْ
بص لها في ذهول وقالها
البلد بتنحرق والأرض بتنسرق
وإنت بتقولي للحمام حِمْ حِمْ
داحنا في نار وحرقة دم
قومي يا ( وَليَّة ) لمي الخلقات
خلينا نرحل من سُكات
الأرض خلاص إتباعت
قومي يا أم البنات
سوي رغفين عيش
من الشوية الرده اللي باقين
من خزين سبع سنوات
يا للا خلينا نمشي
قبل الليل ما يجي
أصلهم بيقولوا
في السما باعوا النجمات
وفي الميه باعوا الدهبات
وع الأرض دقوا الحربات
وكل واحد أخد مناباته
إلا إحنا
نسيونا في قلب الخربات
يا للا بينا يا بهية
قومي لمي الخلقات
وإلحقي حمي البنات
حميهم ( أول وأخر الحُميات )
قبل ما أثيوبيا تقطع المية
آآآآآه يا بهية
ليه الأيام علينا مستقوية
والعمر ما عاد فيه باقي
أد اللي فات
خلينا نشوف حالنا
ورانا تجهيز البنات
والقيراطين خادهم سمعان
كان جاي وفاتح بوقة
وكأنة ديب سعران
خلينا نشوف حالنا
سمعان خلاص فات
ولف السبع لفات
وخاد في ديله القيراطين
وندب الحظ الإسود
هيوصلنا لليمان
هنبقا نندب حظنا
في أوضة بعشر بوابات
ونلطم زي النسوان كمان
بس شهلي يا وَليَّة
الليلة ساعة الفجرية
هنغير الوطن والعنوان
فيه مراكبي بألف جنية
هيخدنا لشواطئ اليونان
واحنا ونصيبنا يا نعيش
يا نغرق زي الطفل إيلان
إحنا تعبنا يا وَليَّة
من السلف والجمعية
والجلابية ما عادت فيها
رُقعه تستر الحرمان
البنات أهم ماشين حافيين
ويشبعوا طقة يجوعوا إتنين
واحنا لإمتى هنفضل صابرين
هو إحنا ايه مش بني أدمين؟؟!!
بعتب عليك يا وطن
ليه بتهين الإنسان
ليه بتهتك عِرضة
وليه بتغتصب أرضة
وليه بتغربة
معقولة يا وطن
خليت ياسين حيوان !!!!
أنا نفسي مره أعرف
ليه بس إيدك قوية
يا وطن علي الغلبان
وصدق إللي قال
إن الغلابه فيك يا وطن
ملهمش مكان
:؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
ملحوظة هامه :
لا أسمح بتقليد أشعاري أو الإقتباس منها ولو شطرة واحدة
ومن يفعل ذلك فسيخسر صداقتي إلي الأبد في الفيس وفي الواقع
مع تقديري وإحترامي للجميع
ياسين وبهية والذئب سمعان
بقلم الشاعر يوسف الحمله
18/5/2016
تعليقات
إرسال تعليق