. ( مساوئ صدف)..للشاعر المبدع...محمد عامر الشاعر.
( مساوئ صدف)
كان ماشى وتايه فى الشارع
بيفكر فى سنين قضاها
مسحوب مخطوف ومهوش راجع
وكإن الدنيا بقت هيا
و ف وش بنات حوا لاقاها
كام مرة عشان بس يشوفها
كان طول الليل يستناها
مش عارف أوصف ل مشاعره
كان كل ما يدعى بيبكيلها
كان يحلم لو يبقى معاها
والدنيا مجاتش على مرامه
واتسددت سككه قدامه
واتحدى الكون معملش برئ
واتمنى يشق البحر طريق
علشان يوصل ومكسلشى
كان طول أيامه مبينامشى
وعموما راحت أيامها
من شارع أو مدرسة جنبه
من ليلة شتا قضتها ف حضنه
لكن موجودة هنا ف قلبه
وأخينا اتاخد من شارع
لشوارع تانية على الفاضى
وكإن ريحتها بتندهله
والروح مسحوبه على الماضى
ومسافه بعيدة هتجمعهم
مش ممكن أو ممكن عادى
على بعد امتار شاف الصدمة
واتسمر واقف ف مكانه
وصراخ مكتوم جوا العتمة
ونافورة دمع لأحزانه
شاف نسمة عمره بتضحكله
أو هو توقع ضحكتها
وحقيقة الأمر مضحكتشى
إزاى ودى حتى ف مشيتها
كات إيدها ف إيد حد معاها
من دبلته عرف انه خطيبها
محبسش دموعه فسمعتها
من صوت صرخته قالت هوا
واتكسرت ضحكة على خدودها
وانفجرت لكن من جوا
ودموعها بتسبق لحنينها
راح جرى واتجنن وحاضنها
وف وسط الشارع ركعتله
وقالتله انسانى عشان خاطرى
روحى جواك وانا مش منها
ومشافش قصاده غير الضلمة
واتبخر طيفها كإنه مكانش
راح جرى زى المجانين نادى
ازاى بيهون وهواها مهانش
وصاحبنا مروح على بيته
ودموعه بتنزف نهايتها
وحياته اتختمت بلقاها
من عشمه وزعله على هواها
راح ماشى وسايب دنيتها
واحتضن الصورة اللى شايلها
راح بص بكل ما يملك فيها
والروح كات خرجت لحظتها
هتعيش كام يوم بعدك هيا؟؟؟
والدنيا هتكمل من غيرك؟؟؟؟
متخافش دى حبت روحك بس
والروح بتموت لو ماتت روح
قد ماتت بعدك يا عاشق
فحياتها ختمت من عمرك
والعشق جمعكم فى دنيا
....القصيدة دى متأكد انها هتعجبكم أوى
تقريبا على واحدة وتلت
تعليقات
إرسال تعليق