''''وجع مركون''''..للشاعر المبدع'''''''محمد عامر الشاعر'''''
وجع مركون
ومشهد خوف بيتكرر
وقلب وروح بتتمرر
وكان المشهد التالى
فى فلم حياتى م الأول
سنين بتهون
صور كرتون
كأن حياتى والفرحة صور كرتون
بتتشكل بإيد مخرج يحط
نهاية ملهاش لون
كوميديا تخلى أحلامك
سراب مرهون
وقلب وراها بيعيط
كإن الطفل جوايا
بيصرخ لما قربنا
ومات موهون
وصوت مكتوم
وصرخة قلب ملهاش صوت
وروح مسجونة فى الملكوت
جسد جواه روحين بيموت
وقطر الموت خلاص هيفوت
قدر فى الحلم كان مرسوم
وحلم روحين
بيتلخص ف حب اتنين
عاشولهم فترة متفقين
وكان الوعد واخدينه
هعيش بيكى واعيش فيكى
وهيا تقول أنا منك يا ضى العين
وفرحة بنت ف العشرين
تساوى فرحة الدنيا عشان عايشين
ومات الحلم ف ثوانى
عشان بعده يموت اتنين
ومات القلب يا سادة عشان عاجز
سنين الحب خلت سعره حتى رخيص
كل الحكاية اتلخصت واترتبت
عشان يا سادة جالها عريس
وانا واقف مفيش حيلة
ولا هيا بتخلق حل
عشان الحب جوانا
قلوبنا الخايبة شبعت ذل
وعاوزة تضحى بسعادة
عشان الحب فينا يعيش
دراما ف مشهد الدنيا
ودمعة عينى متخبيش
وجع مركون
صور كرتون
كإن المشهد التالى حنين وفراق
وقلب يسيب حبيبه يموت
وبيقولك انا مشتاق
يغور الحب لو تبقى النهاية هلاك
ومين قرر يكون إنسان
ومن قرر يعيش ف ملاك
ملوش نشوة عشان الحب
ومين قرر يعيش بلا قلب
قدر بنعيشه ف حياتنا ومين مظلوم
ومين ف الدنيا كان موهوم
انا وهيا
......... وحب من الحياة محروم
............النهاية...............
دي البدايه بدايه فرح هيدوم
ردحذفربنا يسعد ايامكم ياشاعر النيل
ردحذفجميله جدا جدا والله
ردحذف