...السياسة للمبدع« للشاعر يوسف الحمله »
السياسة « للشاعر يوسف الحمله »
في أول لقاء تلفزيوني
على الهواء مباااااااشرة
سألني المذيع وقالي
مساء الخير يا شاعرنا
هنتكلم في ايه النهارده
قلت له
هنتكلم في السياسة
بص لي في إندهاش
وقالي : في السياسة
السياسة دي نجاسة
قلت له لا
السياسة دي كياسة
والذكي اللي يقنع شعبه
ويطلع بتصريحات سليمة
مش بتصريحات كلها إفتكاسة
عيوب الحكام
في إدارة البلاد
بتخلق فيها ألف إنتكاسة
بتصحصح الغلبان وبتفوقه
والغلبان لما بيفوق بينهار
وبينهار معاه كرسي الرئاسة
ف سمع كلامي المسؤول
لقيته نط زي الغول
وقالي
إنت يا واد إبن مين
وبتقول الكلام ده لمين
إنت فاكر نفسك حاجه
إنت واحد م الغلبانين
إللى لما نبص له يختفي
حتى لو كان م الفنانين
والسياسة
مالك إنت ومال السياسة
دي نجاسة
وأنت واحد من الأطهار
إبعد يا ابني
وقصر على نفسك المشوار
روح للجنه بلاش للنار
جرب تكتب عن العشاق
جرب تكتب عن الفراق
حاجات كتير تلهيك عننا
وتبقى معانا مش ضدنا
إنت عايزنا نشحت زيك
ولا انت عايز تبقى زينا
فوق يا ابني إنت بتغرق
وهتغرق معاك عيلتك
هتعض فينا تبقى بتغلط
وهتشيل لوحدك شيلتك
أحسن لك إرضا بعيشتك
وإتحرك على أد حدودك
وإتكلم على أد قيمتك
إنت تعرف قيمتك ايه
ولا قيمتك تساوي كام
قطيع بيطلع في الأفلام
وبيخدم على الأبطال
والابطال
بتأدي دورنا وبالتمام
حتى الإعلام
قبل الظهور حافظ الكلام
إحنا يا ابني مبنلعبش
وإللى بيلعب معانا ما بيكسبش
خلاص فهمت يا روح أمك
ولا لسه
فهمت أيوه فهمت يا بيه
والله العظيم أنا فهمت
هكتب عن أبو زيد وعنتر
لا بلاش لا أنسى واتهور
وأرجع من تاني أتعور
هكتب عن قيس وأتصور
إن ليلى هتموت عليَّ !!!
وأنا إللى عليها مبسألش
دانا بكمل عشايا نووووووم
وافطر يوم وأصوم يوم !!!
وأفرح أوي بالقرش الإسود
أهو ينفعني في وقت لزوم
خلاص يا بيه وما تزعلش
إطمن بقى وإتفضل إمشي
يك صاروخ يخدك ويمشي
سيبت ركبي يخرب بيتك
إمشي عشان الدنيا تمشي
وقفت المراكب السايره
وقفت العجله اللي دايره
وشيلت النور من وشي
وقبل ما يقفل المسؤول
لقيتني بصرخ فيه وبقول
إستنى يا سعادة البيه
يا سعادة البيه
أنا والله مش جبان
ولا زيك ديب سعران
ولا بهتك في الأعراض
ولا في حلبه إستعراض
أنا زي ما انت قلت
أنا فعلاً واحد غلبان
بس عارف حقي فين
وحقي كام وعند مين
لو هسيبه
يبقى أنا بقتل عيالي
وعيالي دول رأس مالي
وأنت عارف الضنا غالي
ولا عيالكم غالية عليكم
وعيالنا اللي رخيصة علينا
رد عليَّ يا سعادة البيه
ولا جالك سد الحنك
ولا انت حسيت بالهلك
ولا انت خوفت
شفت أيوه انت خوفت
والخوف أهو بان عليك
ولو مش خايف
ليه جايب الكلاب تحميك
ولا هي يعني فشخره
وعلى الغلابة بس منظره
ولا كتر فلوس وخلاص
عرفت ليه الشعب ثار
وقرر يدوسكم بالمداس
يا للا غور يا للا أمشي
الشعب المصري ما بيخفشي
الشعب المصري ما بيخفشي
الشعب المصري ما بيخفشي
السياسة
بقلم الشاعر يوسف الحمله
8/12/2016
تعليقات
إرسال تعليق