آه يا فلاحين آه ( للشاعر الكبير يوسف الحمله )
آه يا فلاحين آه ( للشاعر يوسف الحمله )
إزاي طن البنجر
يا أهل البندر
ب 500 جنيه
وازاي طن السكر
يا أهل البندر
ب 10,000 جنيه
والفـلاح
يا أهـل البندر
ما في حد
حاسس بيه
بـيـبيـع من
قوت عياله
علشان يقدر
يجيب السولار
والصفيحه دلوقتى
بقت ب 50 جنيه
وده كله على ايه
على زرعه
بتفضل 6 شهور
فـ الأرض مركونة
وفـ الأخر يا ولداه
بتطلع مديونه
ويقولوا الفلاح
عايش مرتاح
وبياكل سمين
وعملنا له نقابة
علشان يتساوى
بالأطباء
والمحامين
والمهندسين
وهو أصلاً واقع
من التأمين
طب فين
نقيب الفلاحين
أقولكم فين
أضـواء المديـنة
أكيد غيرته
فـ خلع الـعمـه
وخلع القفطان
وقال يغير بهانه
نزل شارع الأهرام
شاف الغازيه
السهتانه أم لبانه
وكأنه في حياته
ما شاف نسوان
هبدته رمش
طب يا عيني
زي الجردل أوام
والنقطة نزلت مطر
وصبحت بالفدان
ونسي الغلابة
ونسي التأمين
وأدى النقابة
يا فلاحيييين
وقولولي مين
هيدور عليكم
أو هيسأل فيكم
أو هيهتم بيكم
لا البنجر سكركم
ولا القصب عسلكم
ولا القمح عيشكم
ولا حتى اللحمه
هتشوفها في عيدكم
وحسكم عينكم
حد يطلع له صوت
البلد مش ناقصه
خلوا الأيام دي تفوت
وان شاء الله
ومن غير مقاطعة
في المشمش
هيشوفوا مشاكلكم
ويحاولوا يحلوها
والأسعار ينزلوها
واللحمه يرخصوها
والزراعة يدعموها
والحراميه يعدموها
بلغوفي المشمش
إبقوا قابلوني
لو قدروا يعملوها
آه يا فلاحين آه
بقلم شاعر الحدث
الشاعر يوسف الحمله
27/4/2017
تعليقات
إرسال تعليق