...لجام...للشاعر المبدع...الشاعر طه ابراهيم
لجام
@@@@@@@@
أدور ف عقلي وفين الكلام
واهيص وازعق ف وش المدام
وازعّل ولادي وارمي السهام
واخاصم واصالح ف عز الهيام
وحالي يلخبط عقول الكرام
واشخبط ولخبط وارسم حمام
واحس إني جاهل وناقص علام
واحس إني عايز أبطل كلام
وادور ف نفسي مفيش إنسجام
وفكره تجيلي وتجري أوام
وادور عليها ف بطن الظلام
نفسي قصيده تكون الختام
واقول الحقيقه برغم الالام
لساني معاند ولابس لجام
وعامل مطنش ورافض ملام
وباع القضية ف وسط الزحام
وسابني لوحدي وقالي سلام
ياغاوي المشاكل كفايه حرام
هاتفضل مكابر وعامل هُمام
وماشي لوحدك ف وسط الغيام
وتنفخ في قربه وعايز لحام
وتقطع ف قلبك بدون إهتمام
وتدّن ف مالطه ياعمي الامام
وصوتك يجلجل ف وسط النيام
ومين اللي يصحي يقولك تمام
ومين اللي فاهم في شعرك كلام
ومين اللي يقدر يرد اللئام
ياريتك تبطل وترمي سلام
وتنسي شعورك وتنسي الهيام
وترجع لنفسك وتترك أوام
وتحضن ولادك وترضي المدام
وتحسب معاها البطاطس بكام
وتمسح وتضبخ بكل احترام
تعلم ولادك أصول النظام
وتعرف بإنك عليك إلتزام
تفكر ف بكره بكل إهتمام
وتنسي المشاعر يا عمي الإمام
وتقفل دماغك وآخر تمام
وتمسك لسانك هتلقي السلام
وراسك ف ريشك كأنك نعام
وخالد يصحبك وعمك حسام
وتلقي حياتك ف وسط العوام
منعّم مدلل وتعرف تنام
ياريتك تقرر يا عمي الامام
@@@@@@@@
بقلم / طه إبراهيم
تعليقات
إرسال تعليق