...يا_بلادي..للشاعر المبدع...إبراهيم بدر عبدالله
كلامي تاه ف إحساسي
عملت بأن انا ناسي
نسيت أهلي نسيت ناسي
مشيت لجلك سكك واعرة
على شطوطك أنا راسي
بموت لجلك ومش شاعرة
وشخبطتي في كراسي
يا حلم ولسة م حلمتوش
يا فكر وعمري م قرتهوش
يا كلمة جوا سقف الحلق
وغنوة فوق وشوش الخلق
ترابك تاج وفوق راسي
أطبطب فوق سنين عمرك
أنا أصلي فدا أمرك
وليلك ليه يكون جمرك ؟
بيحرقني وم ..بيواسي
عشان ببعد تعاتبيني
تشوفي الغربة ف جبيني
بلاش بالهم تكويني
بلاش كتم في أنفاسي
في وقت الشدة أنا جيشك
ووقت الجوع بكون عيشك
وساعة الفرح برقصلك
ووقت الزرع تبان فاسي
أنا ببهت عشان زهوك
أنا النسمة فدا جوك
ليه الشدة تكون ضوك
وليه طبعك يكون قاسي
إبراهيم بدر عبدالله
تعليقات
إرسال تعليق